Dr Byron Camilleri huwa politiku u avukat Malti li jservi bħala Ministru għall-Edukazzjoni u l-Isport.
Il-Karriera tiegħu fis-servizz pubbliku bdiet fl-2010 meta ġie elett bħala l-iżgħar Sindku tal-Fgura. Matul il-mandat tiegħu kiseb reputazzjoni għal tmexxija effettiva fil-livell lokali u għall-impenn kontinwu tiegħu favur il-komunità. Din l-esperjenza wasslet biex fl-2017 ġie elett fil-Kamra tad-Deputati.
Wara l-elezzjoni tiegħu fil-Parlament, Dr Camilleri nħatar Whip tal-Gvern, fejn kien responsabbli mill-koordinazzjoni tal-ħidma parlamentari u għall-aġenda leġiżlattiva tal-Gvern. Huwa magħruf għall-għarfien tiegħu tal-proċeduri parlamentari u sal-lum għadu jservi wkoll bħala membru tal-House Business Committee.
F’Jannar tal-2020 nħatar Ministru għall-Intern, is-Sigurtà Nazzjonali u l-Infurzar tal-Liġi, fejn kien responsabbli minn uħud mill-aktar istituzzjonijiet kruċjali tal-pajjiż, fosthom il-Korp tal-Pulizija, id-Dipartiment tal-Protezzjoni Ċivili, il-Forzi Armati ta’ Malta u s-Servizzi Korrettivi.
Wara l-Elezzjoni Ġenerali tal-2022, il-Prim Ministru Robert Abela reġa’ ħatru Ministru u fdalu portafoll estiż bħala Ministru għall-Intern, is-Sigurtà, ir-Riformi u l-Ugwaljanza. F’din il-kariga mexxa numru ta’ riformi ewlenin filwaqt li kompla jsaħħaħ il-ħidma fil-qasam tas-sigurtà nazzjonali, l-infurzar tal-liġi, il-promozzjoni tal-ugwaljanza, il-libertajiet ċivili u d-drittijiet tal-minoranzi.
Fl-2024 ingħata portafoll rivedut u estiż bħala Ministru għall-Intern, is-Sigurtà u x-Xogħol. Dan il-portafoll irrifletta allinjament strateġiku ġdid tal-prijoritajiet nazzjonali u poġġieh responsabbli minn firxa wiesgħa ta’ oqsma ta’ politika u riformi.
Fl-Elezzjoni Ġenerali tal-2026, Dr Camilleri reġa’ kiseb il-fiduċja tal-elettorat u ġie elett fil-Kamra tad-Deputati bħala parti mir-raba’ rebħa elettorali konsekuttiva tal-Partit Laburista. Sussegwentement inħatar Ministru għall-Edukazzjoni u l-Isport, wieħed mis-setturi ewlenin identifikati bħala pilastri tal-Viżjoni Malta 2050, filwaqt li baqa’ responsabbli wkoll miċ-ċittadinanza.
Dr Camilleri huwa avukat b’professjoni. Huwa ggradwa bħala Duttur tal-Liġi mill-Università ta’ Malta fl-2012 u fl-2013 ġie ammess għall-prattika tal-avukatura.